1 Tawarikh 12

Inde sia tu tau sae lako Daud dio Ziklag, tonna toyangpa dio mai Saul, anakna muane Kish. Mintu’i te naala bilanganna to lalong, to untundui lan kasirarian.

Tau iato umbaa pa’buno pana sia manarang patomali ma’kolak batu sia ma’pana. Dio mai sukunna Saul, dio mai Benyamin iamotu:

Abiezer, pangulu sola Yoas, anakna muane Semaa, to Gibea; Yeziel sola Pelet, anakna muane Azmawet; Berakha na Yehu, to Anatot;

Yismaya, to Gibeon, misa’i tu to pa’barani tallungpulo sia kamandangna to tallungpulo; Yeremia, Yehaziel, Yohanan na Yozabad, to Gedera;

Eluzai, Yerimot, Bealya, Semarya na Sefaca, to Harufi;

Elkana, Yisia, Azareel, Yoëzer na Yasoham, to Korah;

Yoëla na Zebaja, anakna muane Yeroham dio mai Gedor.

Iatu to Gad den duka pira menturu’ lako Daud, tonna lan tambakuku dio padang pangallaran, pa’barani lalong, to malinta’ parari, to umbaa pa’buno balulang na doke, iatu rupanna tau iato mai susi singa, sia matira’ susi kijang, iamotu:

Ezer, pangulu; Obaja, ma’penduanna; Eliab, ma’pentallunna;

Mismana, ma’penna’pa’na; Yeremia, ma’pellimanna;

Atai, ma’pennannanna; Eliel, ma’pempitunna;

Yohanan, ma’pengkaruanna; Elzabad, ma’pengkaseranna;

Yeremia, ma’pessangpulona; Makhbanai, ma’pessangpulo misanna.

Mintu’i te naala bilanganna bati’na Gad, na tau iamote mai tu kamandang surodadu; iatu bitti’na unnea tau saratu’ na iatu kapuana unnea tau sangsa’bu.

Tau iamoto mai tu ullambanni Yordan, tonna bulan pamulanna, tonna sapu randanan uainna sia iamotu unnula’i pa’tondokan diong lombok lu lako matallo sia matampu’.

Sae dukami tu ba’tu pira-pira to Benyamin sola to Yehuda umpellambi’i Daud dio to’ tambakuku.

Tassu’mi tu Daud male umpessitammui tau iato mai nakuami lako: Iake sae melo siakomi umpellambi’ina’ la untunduina’, manassa la misa penaaki’; apa iake la saekomi kadake la ussorongna’ lako balingku, moi tae’ kakadakean dio limangku, na Kapenombannamora nene’ to dolota untiroi sia unnukungi.

Attu iato Narampoimi Penaa tu Amasai, pangulunna tu tau tallungpulo nakua: Taummikan, e Daud; la sisolaki’, o anakna Isai! Lamaupa’komi, la maupa’komi! La maupa’ tu to untunduikomi! Belanna Kapenombammi untunduikomi. Natarimami Daud tu tau iato mai anna angka’i pangulu surodadu.

Dio mai Manasye denni tilele male unturu’ Daud, tonna male sola to Filistin la sirari Saul; moi susito tae’ duka natundui Daud, belanna natimbang tongan arung kota to Filistin anna suai sule, belanna nakua: La naalai ulunta namane untampeki’ sule lako Saul, puangna.

Iatonna malemo tu Daud lako Ziklag, tilelemi dio mai to Manasye male unturu’ Daud: tu Adnah, Yozabad, Yediael, Mikhael, Yozabad, Elihu na Ziletai, pangulunna to sangsa’bu dio Manasye.

Iate tau iate mai untundui Daud umpangului sangtuntunan surodadu, belanna pa’barani lalong nasangi sia dadi kamandang surodadu.

Kiallo-kiallo sae tu tau lako Daud la untundui, naurungan mendadi sangkaponan surodadu kapua, susi sangkaponan surodadunNa Puang Matua.

Inde sia tu bilanganna tau lan mintu’ tuntunan, tu sae lako Daud dio Hebron, sakka’ la parari, la umpalelei tu kadatuanna Saul lako kalena, situru’ kadanNa PUANG:

iatu to Yehuda, tu ma’balulang sia ma’doke, annan sa’bunna karua ratu’na, sakka’ la parari;

to Simeon, iatu pa’barani lalong lan kasirarian pitungsa’bu ssaratu’;

to Lewi, patangsa’bu nnannanratu’;

sia Yoyada, arungna bati’na Harun sia iatu tau nasolan, tallungsa’bu mpituratu’;

sia Zadok, misa’ to mangura, iamo pa’barani lalong sola sangdadianna, duangpulo ndua pangulu.

To Benyamin, sangsukunna Saul, tallungsa’bu; apa sae lako attu iato budapi tu tau iato mai la’ka’pa penaanna lako bati’na Saul;

to Efraim, duangpulo sa’bu karua ratu’na, iamo pa’barani lalong, to mala’bi’ lan rapunna.

Na dio mai sangsese suku Manasye sangpulokarua sa’bu tau, tu disa’bu’ sanganna, sae la unnangka’i datu tu Daud;

to Isakhar, tu manarang untandai attu melo, anna issanni tu apa sipato’ la napogau’ to Israel, duaratu’ pangulunna sola mintu’ siulu’na tu naparenta;

to Zebulon, tu tassu’ sola surodadu, umbaa ma’rupa-rupa pa’buno, sakka’ la parari, limangpulo sa’bu, tu ma’pampang kalebu penaa la parari;

to Naftali, sangsa’bu kamandang, sia iatu to nasolan tallungpulo mpitu sa’bu, ma’balulang sia ma’doke;

to Dan, tu sakka’ la parari, duangpulo ngkarua sa’bu annan ratu’na;

to Asyer, tu tassu’ sola surodadu, to sakka’ la parari, patangpulo sa’bu;

lu sambali’na mai Yordan, to Ruben, to Gad sia dio mai sangsese suku Manasye, saratu’ duangpulo sa’bu, tu to sakka’ pa’bunona la parari.

Mintu’i te to parari, sae unturu’ atoran kapararian, bulo lollong penaanna lako Hebron, la unnangka’i datu tu Daud, umparenta mintu’ to Israel. Sia mintu’ to Israel torronapa sanginaa la unnangka’i datu tu Daud.

Torromi tu tau iato mai inde to dio sola Daud tallung allo, anna kumande sia mangiru’, belanna napasakkarammo siulu’na tu mintu’ apa tu tau iato mai.

Sia mintu’ tu to nasikandappiran tiku lao sae lako Isakhar, Zebulon na Naftali umbaa kande nateke’ dao keledai, unta, bagala’ na sapi, iamotu kande ta’pung digaragai, deppa bua ara dirangkei na deppa bua anggoro’ dirangkei, uai anggoro’ na minna’ sapi na domba sola bembe’ lendu’ budanna, belanna kaparannuanna mintu’ to Israel.